Madalas may mga tumutulong lang para magkaroon ka ng utang na loob sa kanila,
Upang kung dumating man ang panahon na sila naman ang mangailangan.
May malalapitan din sila, may puwede silang sabihin—
Parang ang pagtulong ay isang tanim na sa dulo ay aanihin.

Sa totoo lang, bihira na lang ang pagtulong na walang ibang motibo.
Walang ibang hangad kundi ang pagtulong lang mismo.
Kung ganoon lang sana siguro—
Wala rin matatakot humingi ng tulong lalo na ang mga taong gusto nang sumuko.

Ang nakakatakot lang kasi madalas sa paghingi ng tulong,
Ang mga salitang maaaring mong marinig pagkatapos nito.
Kung sapat na ba ang pasasalamat—
O babanggitin pa ito sa hinaharap.

Sana ang pagtulong ay walang hinihintay na kapalit.
Sana ang pagtulong ay puro lang pagmamalasakit.
Hindi dahil may iba pang nakakabit—
Kung ganoon lang sana.

Kaya,
Para sa mga tulong na walang sumbat—
Salamat.